Hæ kæru Maclendingar. Ég heiti Hörður Ágústsson og stofnaði Macland ásamt Svölu Hjörleifsdóttur árið 2009 á Vífilsgötu í Reykjavík. Þar sátum við frameftir nóttu eftir nóttu með tvö ungabörn að gera við tölvur. Stuttu síðar hófum við sölu á Apple vörum og fengu fyrstu viðskiptavinirnir valkost um að sækja á heimili okkar á Vífilsgötu eða fá heimsendingu þar sem ég mætti með GSM posa til þeirra. Árið 2010 kom ástkær vinur minn, Hermann Fannar Valgarðsson, inn í myndina og úr varð fyrsta verslun Macland sem opnuð var 21.desember 2010 í gamla Sirkushúsinu við Klapparstíg 30. Hermann Fannar lést árið 2011 og varð hans skarð aldrei bætt að fullu en orkan, hugmyndirnar og framkvæmdagleðin varð eftir. Við tók tímabil þar sem Macland fluttist milli staðsetninga á Laugavegi, opnaði verslun í Hafnarfirði, lokaði verslun í Hafnarfirði, opnaði verslun í Kringlunni og rak verkstæði í Ármúla.
En það sem fer upp þarf að koma niður aftur sagði einhver og seint árið 2021 og snemma árs 2022 urðu miklar breytingar hjá þáverandi rekstrarfélagi Macland sem endaði með því að ég hætti störfum og afskiptum af félaginu. Árið 2024 varð mikill bruni í Kringlunni og á fyrri hluta þessa árs (2025) var Makkland ehf. tekið til gjaldþrotaskipta.
Hvert einasta skref sem við tókum frá árinu 2009 var lærdómsríkt og það leikur enginn vafi í dag á því að sú reynsla að hafa byrjað á svona hráum grunni á sínum tíma hafi skapað þá ástríðu sem við berum í brjósti fyrir Maclandinu okkar. Sá meðbyr og hvatning sem okkur hefur borist síðustu mánuði hefur verið ómetanlegur en það sem hefur kannski komið mér mest á óvart eru samskiptin við birgjana sem ég byggði upp áður en ég hætti. Þar voru skilaboðin skýr – Vertu velkominn til baka og gangi ykkur vel.
Það er falleg tilfinning sem hríslast um okkur þegar horft er til baka á fyrstu viðgerðina sem framkvæmd var á eldhúsborðinu á Vífilsgötunni. Allar hindranirnar, lærdómurinn, tækifærin og svo allar manneskjurnar sem við tengdumst í gegnum Macland á árunum 2009- 2022 gerðu þetta allt að veruleika. Þið, viðskiptavinir Macland eruð hér enn. Fyrir það erum ég og Svala gríðarlega þakklát.
Nú byrjum við aftur, gamalt vín á nýjum belg. Eitt skref í einu, en markmiðið er það sama og alltaf. Veita bestu þjónustu á landinu fyrir Apple notendur. Litla, gamla og góða Macland er í vinnslu.
We’re back.
Hörður, Svala, Matthildur og Hrafnhildur
❤️
